بقلم : شادي جاد
الصليب لما يموت عليه اله .. من الطبيعي جدا اننا نسأل ليه كل دا ؟ و مش عيب اننا نسأل ليه .. بس السؤال مش هيكون ليه الصليب .. لكن السؤال اللي وجهة نظري الاهم في القضية دي هو : لماذا الاله ؟
المشكلة مش في الصليب .. لكن المشكله في الاله اللي كان على الصليب ..
وانا بفكر جوايا بالمنطق الانساني و اضم فكري لفكر الناس اللي عندها مشكلة في موضوع الصليب .. لاقيت جوايا شوية اسئلة و افكار عاوز اشاركك ببعضها في المقال دا وهي ليه بعض الناس رافضة انه الاله يتصلب ؟؟
هل لانهم عاوزينه منتصر ؟ و هو هناك ظهر انه مغلوب ؟؟ .. او على ما يبدو ليهم
هل تعريف ” الغلبة ” هو البقاء حيا ؟؟ .. فيه ناس كتيرة ماتوا و هما منتصرين .. و ناس اكتر عاشوا و هما مغلوبين
او هل يمكن الاله دا خرج عن حدود المنطق .. بس السؤال هل للمحبة حدود و منطق ؟
يمكن علشان شايفين التضحية ضعف ؟؟ .. و ان القوة في قتل الاخريين و الانتصار عليهم بتدميرهم ؟؟
هل الصليب بيعلن عمق محبة الاله ؟؟ ولا بيكشف في نفس الوقت حقيقة شر الانسان ؟؟
اعتقد المشكلة مش في الناس اللي بيقولوا على الصليب انه اسطورة ، لانه على الاقل بيلمس معنى المحبة الحقيقية في الاسطورة . و لكن المشكلة موجوده في اللي بينكر الصليب رافض اللي فيه من محبه .. و هنا برضو لازم نسأل ليه ؟؟
هل لان قصة محبة الاله الموجودة و الظاهرة في الصليب هي ضد منطقه ؟ ولا ضد عقيدته ؟ ولا فوق مستوى ادراكه ؟
ايه اللي هيتغير بالنسبة ليه لو الصليب حقيقة فعلا ؟ و ايه اللي هيضره ان كنت انا شايف فيه محبة عظيمة ؟؟
ناس شايفه يسوع المصلوب مغلوب .. و احنا بنشوفه منتصر غالبا
بيتشاف ضعيف .. و احنا بنشوفه قوي
مش شايفين المحبة .. لكن احنا غيرتنا المحبة دي
مهما كان الناس بيشوفوا قصة الصليب ازاي ، انا اتعلمت منها انه ليس لاحد حب اعظم من هذا ان يبذل احد نفسه من اجل الانسان الذي يحبه. ان كانت هذة القصة حقيقية او اسطورة .. على الاقل بنشوف فيها محبة الاله .. فلو اسطورة فاعتقد ان اللي كتبها و كل من يرى فيها من محبة تمنى ان يكون الاله الذي يعبده يحبه مثل هذا الحب العجيب اللي انا شخصيا بتمنى اننا ندرك حب زي كده و نعيش بيه مع اللي حولينا و نقدمه للانسان مهما كان مختلف عني لكنه انسان .. ولو حقيقة .. فكم احترم و انحني عند هذا الاله الذي يقدرني كل هذا التقديرو يحترم انسانيتي و يقدم معنى جديد للحب لم اختبره من قبل ..
