سيد العبيد ام سيد الاسياد

بقلم : شادي جاد

 لكل اللي بيقولي انه احنا لازم نبقى عبيد للاله ، و احنا نطول نبقى عبيد للاله !! و هو اللي قال كده اننا عبيده

السؤال البديهى اللي لازم يتسأل في الحالة دي هو : ليه عاوزني عبد وهو اللي اوجدني حرا ؟؟ وهل هو فعلا عاوزني عبد ؟؟ ولا الناس هما اللي مش شايفين نفسهم مينفعوش غير انهم يكونوا عبيد هما اللي عاوزين يعملوا كده فيا علشان ابقى زيهم ؟؟ و يكونوا هما سادة لانهم دفعة اقدم في العبودية ؟؟

سيد الحر لا يصنع إلا احرار ، و لكن اللي بيصنع عبيد هو واحد متسلط عاوز يفرض احترامه بالاجبار من خلال سلطته ، و المتسلط لا يستحق الاحترام ، و اللي مش مستحق الاحترام غير جدير بانه يكون سيد ، السيادة الحقيقية مش بتيجي بامتلاك العبيد و لكن بتيجي في المكان اللي فيه الحرية و الكرامة ، علشان كده الاله الحقيقي مش بيعمل عبيد و لكن بيعمل ابناء احرار ويعيش معهم معنى  الحرية

سيد الحر هو سيد الاسياد ، ملك الحر هو ملك الملوك و رب الحر هو رب الارباب ، اما سيد العبيد فهو مش اكتر من اله صنعه مجموعة من العبيد و صدقوا اللي عملوه علشان يستعبدوا الاحرار باسم الاله دا و بكده يبقوا هما اسياد و يحركوا الناس لتحقيق رغباتهم و اهدافهم

كل اللي شايف نفسه عبد هو بيأكد انه العلاقة بينه و بين الهه قايمة على الاستعباد و الخوف و الجهل و الطاعة العمياء .. و ان كان اعمى بيقود اعمى اكيد هيقعوا في حفرة ، و لكن اللي شايف نفسه حر فبيأكد ان الهه هو مش سيد العبيد و لكن سيد الاسياد ، قايمة العلاقة مع الاله دا كعلاقة اب بابنائه احبهم و عاوزهم دايما احرار فكانوا زي ما هو كائن ” حر ” و زي ما عاوز ليهم انهم يكونوا عليه

دايما هتلاقى المكان اللي فيه اله العبيد هو المكان اللي مليان بالظلم و القتل و الذل ، لكن المكان اللي تلاقى فيه نور و ابداع و محبة و الاحترام  فبالتأكيد هيبقى هناك  اله الاحرار

الاحرار بيفكروا مع الههم و بيناقشوه و بيخططوا مع بعض هيعملوا ايه و بيتشاركوا مع بعض ، اما اله العبيد يأمر و يتسلط و يرفض التفكير فيه و كل ما يهمه هو التنفيذ دون مناقشة ، بفهم او من غير فهم ، المهم هو انه يبقى الامر بيتنفذ

من هو الهك ؟؟  … ممكن تفكر في السؤال دا .. و اختار اله مش من صنع العبيد .. لكن اله حقيقي سيد الاحرار